habari Mpya


Jenerali Mabeyo Achangisha zaidi ya Milioni 40 Kujenga Nyumba ya Mapadre Jimboni Rulenge Ngara Mkoani Kagera.

Na: Sylvester Raphael.

Mkuu wa Majeshi nchini Jenerali Venance Mabeyo ameshiriki na kuendesha harambee ya ujenzi wa nyumba ya Mapadre wa Parokia ya Mtakatifu Francisco wa Assiz Jimbo Katoriki la Rulenge Ngara Mkoani Kagera ambapo pamoja na kuchangia ujenzi huo lakini pia aliwaongoza na kuwahamasisha waamini wa jimbo hilo kuchangia ujenzi huo.

Akiwakilishwa na Lt. Jenerali Mnadhimu Mstaafu wa Jeshi la Wananchi Tanzania Samwel Ndomba katika harambee hiyo iliyofanyika katika viwanja vya ofisi za Baba Askofu wa Jimbo Katoriki la Rulenge Ngara Seveline Niwemugizi Septemba 8, 2019 Mkuu wa Majeshi Jenerali Mabeyo alichangia kiasi cha shilingi milioni 10 na kuchangisha jumla ya shilingi milioni 40 taslimu na ahadi katika harambee hiyo.
 
Naye Mkuu wa Mkoa wa Kagera Brigedia Jenerali Marco E. Gaguti (kushoto) akimuunga mkono Mkuu wa Majeshi nchini Jenerali Mabeyo katika harambee hiyo alichangia shilingi milioni 10 taslimu na kusema kuwa nyumba hiyo si ya Mapadre tu bali ya viongozi mbalimbali wa nchi ambao wanaweza kusema neno kwa wananchi na mkoa ukasonga mbele kwa maendeleo hasa kwa kupunguza mauaji katika jamii. 
Awali kabla ya harambee hiyo mwakilishi wa Mkuu wa Majeshi nchini Lt. Jenerali Mstaafu Ndomba alishiriki katika ibada takatifu iliyongozwa na Askofu wa Jimbo Katoriki la Rulenge Ngara Seveline Niwemugizi katika Parokia ya Mtakatifu Francisco wa Assiz Ngara ambapo aliweza kutoa ujumbe kwa waamini wa kanisa hilo kuchangia ujenzi wa nyumba za Mapadre katika Parokia hiyo.

Lt. Jenerali Mstaafu Ndomba ndani ya Kanisa aliwakumbusha waamini kuwa ni heri kumtolea Mwenyezi Mungu mchango kabla yeye mwenyewe hajaamua kujichukulia. “Baadhi ya waamini hujifikiria mara mbili kutoa michango au hutoa chenji badala ya kutoa kitu kizima lakini hewa safi tuvuta bure wote hapa wakati kuna wagonjwa hospitalini wanaivuta kwa kulipia gharama kubwa na hili ni angalizo kwetu kutoa michango kujenga kanisa la bwana.” Alisisitiza Lt. Jenerali Mstaafu Ndomba. 
Naye Askofu Seveline Niwemugizi wa Jimbo Katoliki la Rulenge Ngara akiongoza ibada hiyo ya harambee aliwakumbusha waamini kuwa wafuasi halisi wa Kristo na wasiwe mashabiki tu ambao hupenda kusikiliza mtu anaongea nini na kuishia hapo, bali wabebe msalaba wa kweli kwa kushiriki na kuchangia michango mbalimbali kama wanafunzi wa Yesu walivyojitoa na kuwa wafuasi wa kweli na si mashabiki. 
 
Ujenzi wa nyumba ya Mapadre Parokia ya Mtakatifu Francisco wa Assiz Ngara unahitaji kiasi cha shilingi milioni 400 na inatarajiwa kujengwa kwa kipindi cha miaka mitatu.

 Aidha, katika harambee hiyo mwakilishi wa Mkuu wa Majeshi nchini Lt. Jenerali Mstaafu Ndomba aliweza kuchangisha zaidi ya shilingi milioni 30 taslimu na ahadi zaidi ya shilingi milioni 10.5 ikiwa ni pamoja na vifaa vya ujenzi ambavyo ni saruji mifuko 95.

Post a Comment

0 Comments